សូម​ស្វាគមន៍​ ឯកឧត្តម លោក លោកស្រី​ ចូលមកកាន់គេហទំព័រ «កម្ពុជាស្ថាបនា ធវី | KSN TV Online»​ ទាក់ទងព័ត៌មាន តាមទូរស័ព្ទលេខ 088 64 85 007 !
0

​កម្ពុជា ប្រយុទ្ឋ​ប្រឆាំង​យក​ឈ្នះ ជំងឺ​កូវី​ដ ១៩ ដំណាក់កាល​ទី ១ បាន​ជោគជយ័​

ភ្នំពេញៈ ពិត​ជា​ដំណឹង​ល្អ​ដែល​មនុស្ស​គ្រប់​គ្នា​រង់ចាំ​យូរហើយ ពេលនេះ ក្រសួង​សុខាភិបាល អះអាងថា គិត​ត្រឹម​ម៉ោង ៧ និង ០០ នាទី ព្រឹក​ថ្ងៃ​ទី ១៦ ខែ ឧសភា ឆ្នាំ ២០២០ នេះ អ្នកជំងឺ​កូវី​ដ ១៩ ម្នាក់ ដែល​ជា​អ្នកជំងឺ​ចុងក្រោយ​គេ​នៅ កម្ពុជា បាន​ជា​សះស្បើយ​ហើយ ហេតុនេះ​ស្ថានភាព​ជំងឺ​កូវី​ដ ១៩ នៅ​កម្ពុជា គឺ​ជាសះស្បើយ​អស់ហើយ ដោយ​មាន​សេចក្តីលម្អិត​ដូចតទៅ ៖

១.​អ្នក​ព្យាបាល​ជាសះស្បើយ​សរុប​ឡើងដល់ ១២២ នាក់ ( ស្មើនឹង ៩៩ , ១៨ ភាគរយ ធៀប​នឹង​អ្នក​ឆ្លង​ទាំងអស់ ក្នុងនោះ ស្ត្រី ៣៧ នាក់ និង បុរស ៨៣ នាក់ ) ដែល​មាន​បុរស​ជនជាតិ ចិន ០១ នាក់ , ស្ត្រី​ជនជាតិ ចិន ០២ , ស្ត្រី​ជនជាតិ អង់គ្លេស ០៣ នាក់​, បុរស​ជនជាតិ អង់គ្លេស ០២ នាក់ , បុរស​ជនជាតិ អាមេរិកាំង ០១ នាក់ , ស្ត្រី​ជនជាតិ អាមេរិកាំង ០១ នាក់ , បុរស​ជនជាតិ ប៊ែល​ហ្សិ​ក ០១ នាក់ , បុរស​ជនជាតិ បារាំង ១៩ នាក់ ( ក្នុងនោះ​មាន​ទារក​អាយុ ០៤ ខែ ម្នាក់ ) ស្ត្រី​ជនជាតិ បារាំង ២១ នាក់ , បុរស​ជនជាតិ កាណាដា ០២ នាក់ , បុរស​ជនជាតិ ម៉ាឡេស៊ី ១៣ នាក់ , បុរស​ជនជាតិ ឥណ្ឌូនេស៊ី ០២ នាក់ , ស្ត្រី​ជនជាតិ វៀតណាម ០៣ នាក់ , បុរស​ជនជាតិ ខ្មែរ ៤៣ នាក់ និង ស្ត្រី​ជនជាតិ ខ្មែរ ០៨ ( គិត​ចាប់ពី​ខែ មករា មកដល់​បច្ចុប្បន្ន ) នាក់ ។​

២. អ្នក​កំពុង​សម្រាក​ព្យាបាល ៖ គ្មាន​

៣. អ្នក​ដែល​បាន​រកឃើញ​មាន​វីរុស កូវី​ដ ១៩ ទាំងអស់ ( ទាំង​អ្នក​ដែល​បាន​ព្យាបាល​ជា​សះស្បើយ​ហើយ​ផង ) សរុប ១២២ នាក់ ( ស្ត្រី ៣៨ នាក់ និង បុរស ៨៤ នាក់ )​។​

៤. ករណី​ជា​សះស្បើយ​ថ្មី​៖ ០១ នាក់​

៥. ករណី​ឆ្លង​ថ្មី នៃ ជំងឺ​កូវី​ដ ១៩ ៖ គ្មាន​

៦. វត្ថុ​សំណាក​ដែល​បាន​ធ្វើ​វិភាគ​សរុប ៖ ១៤ ៦៨៤ ( ម្សិលម៉ិញ ១៤ ៦១៥ ) សំណាក ស្មើនឹង ៩០៣ ( ម្សិលម៉ិញ ៨៩៩) សំណាក ក្នុងចំណោម​ប្រជាជន ១ លាន​នាក់ គឺជា​ចំនួន​ច្រើន​ជាង​បណ្តា​ប្រទេស​មួយចំនួន​នៅក្នុង​តំបន់ ។​
​ទោះ​យ៉ាងនេះ ខណៈ​ក្រសួងសុខាភិបាល និង អ្នកពាក់ព័ន្ធ​អះអាងថា កម្ពុជា នៅតែ​មិន​បន្ធូរបន្ថយ​ដៃ ដូចជា​នៅ​តែ​ពិនិត្យ​តាមដាន​អ្នកដំណើរ និង ធ្វើតេស្ត​ជា​បន្តបន្ទាប់ សម្តេច​តេជោ ហ៊ុន សែន ប្រមុខ​រាជរដ្ឋាភិបាល ក្រសួង​សុខាភិបាល និង អង្គការ​សុខភាព​ពិភពលោក នៅតែ​អំពាវនាវ​ដល់​សាធារណជន​នៅ​កម្ពុជា ប្រុងប្រយ័ត្ន និង អនុវត្ត​ឱ្យបាន​ខ្ជាប់ខ្ជួន​នូវ​ការណែនាំ​របស់​រាជរដ្ឋាភិបាល និង ក្រសួង​សុខាភិបាល ជាដើម ជា​អ្វី​ដែល​ក្រសួង​សុខាភិបាល ហៅថា សភាព​ធម្មតា តាម​បែប​គន្លង​ថ្មី ក្នុង​បរិបទ​ប្រយុទ្ធ​នឹង​ជំងឺ​កូវី​ដ​-១៩ នៅ កម្ពុជា ដូចជា អនាម័យ​ដៃ​ស្អាត ពាក់​ម៉ាស់ ( ករណី​ចាំបាច់ ) គម្លាត​សុវត្ថិភាព​សង្គម និង គ​ម្លតាសុវត្ថិភាព​បុគ្គល ចៀសវាង​ការរៀបចំ​កម្មវិធី​ផឹកស៊ី​ដែល​មាន​គ្នា​ច្រើន ។ ល ។ ពោល​គឺ សាធារណជន កម្ពុជា ត្រូវតែ​បន្ត​ប្រុងប្រយ័ត្ន​តទៅទៀត ពុំនោះ​ទេ កម្ពុជា អាច​នឹងរង​ការវាយប្រហារ​ដោយ​រលក​ទី ២ នៃ ជំងឺ​កូវី​ដ ១៩ ដែល​អាច​ជា​រលក​ខ្លាំងក្លា​ជាង​អ្វី​ដែល​កម្ពុជា បាន​រង​នាពេលនេះ ។​

​ចំណែក​អង្គការ ចលនា ដើម្បី សុខភាព​កម្ពុជា ហៅ​កាត់​ថា CMH យល់ថា កម្ពុជា គួរតែ​ផ្អាក​ការលក់ និង ផ្សព្វផ្សាយ​គ្រឿង​ស្រវឹង​មួយរយៈ​សិន ព្រោះ​ភាព​ងាយ​រកបាន នៃ គ្រឿង​ស្រវឹង ធ្វើឱ្យ​ការសេព​គ្រឿង​ស្រវឹង​មាន​ការកើនឡើង ហើយ​ការសេព​គ្រឿង​ស្រវឹង គឺជា​មូលហេតុ​ដ៏​ចម្បង​មួយ​ងាយ​ប្រឈម​នឹង​ការឆ្លង​ជំងឺ​កូវី​ដ ១៩ ។​

​ក្រសួង​សុខាភិបាល ក៏​បាន​ប្រកាសថា សន្និសីទ​ព័ត៌មាន​ប្រចាំ​សប្តាហ៍ ក៏​ត្រូវបាន​ផ្អាក​បណ្តោះអាសន្ន​សិន​ចាប់ពី​ថ្ងៃ​ទី ១៧ ខែ ឧសភា ឆ្នាំ ២០២០ នេះ ហើយ​នឹង​ជម្រាបជូន​នៅពេល​ក្រោយ ប្រសិនបើ​មាន​ការប្រែប្រួល ហើយ​ក្រសួង​បញ្ជាក់​យ៉ាង​ទទូច​ថា ការផ្អាក​នេះ មិនមែន​មានន័យថា ការឆ្លង​ជំងឺ​កូវ​ដី ១៩ នៅ​កម្ពុជា បាន​ចប់សព្វគ្រប់​ទេ ហេតុនេះ គឺ​ត្រូវ​បន្ត​ការប្រុងប្រយ័ត្ន​តទៅ​ទៀត​ជា​ដាច់ខាត ៕

Filed in: ព័ត៌មានជាតិ

Recent Posts

Proudly designed by Theme Junkie.