សូម​ស្វាគមន៍​ ឯកឧត្តម លោក លោកស្រី​ ចូលមកកាន់គេហទំព័រ «កម្ពុជាស្ថាបនា ធវី | KSN TV Online»​ ទាក់ទងព័ត៌មាន តាមទូរស័ព្ទលេខ 088 64 85 007 !
0

ព្រៃឈើ​នៅ​តំបន់​ដែន​ជម្រក​សត្វ​ព្រៃភ្នំ​ឱ​រ៉ា​ល់ តំបន់​ដែន​ជម្រក​សត្វ​ព្រៃភ្នំ​សំ​កុស​និង​ដែន​អភិរក្ស​ជួរ​ភ្នំក្រវាញ​ភាគ​កណ្ដាល​ប្រឈម​និង​វិនាស​អន្តរាយ​នៅពេល​ខាងមុខ​!

ខេត្ត​ពោធិ៍សាត់ ៖ យោង​ប្រភពពី​ស្រុក​ភ្នំក្រវាញ បានឲ្យដឹងថា ព្រៃឈើ​នៅ​តំបន់​ដែន​ជម្រក​សត្វ​ព្រៃភ្នំ​ឱ​រ៉ា​ល់ តំបន់​ដែន​ជម្រក​សត្វ​ព្រៃភ្នំ​សំ​កុស និង​តំបន់​អភិរក្ស​ជួរ​ភ្នំក្រវាញ​ភាគ​កណ្ដាល ត្រូវបាន រង​ការកាប់​ដឹកជញ្ជូន​យកទៅលក់​យ៉ាង​រលូន ដោយ​មាន​ការឃុបឃិត​ពី​មន្ត្រីរដ្ឋបាល​ព្រៃឈើ និង​សមត្ថកិច្ច​ពាក់ព័ន្ធ​ក្នុង​ខេត្ត​ពោធិ៍សាត់​។​

​ប្រភព​បាន​បន្តថា មេ​ឈ្មួញ​ឈើ ដ៏​មាន​ឥទ្ធិពល​ប្រចាំ​ស្រុក​ភ្នំក្រវាញ​ខេត្តពោធិ៍សាត់​ឈ្មោះ តែម ធារ៉ា ដែលជា​មេបញ្ជាការ​កងរាជអាវុធហត្ថ​ស្រុក​ភ្នំក្រវាញ​។ ជាងនេះទៅទៀត​ឈ្មួញ​ឈ្មោះ តែម ធារ៉ា តែងតែ​ប្រើប្រាស់​ឈ្មោះ​លោក​ឧត្តមសេនីយ៍ត្រី អ៊ុក សាម៉ុន មេបញ្ជាការ​កងរាជអាវុធហត្ថ​ខេត្ត​ពោធិ៍សាត់ ធ្វើ​ជា​បង្អែក​ដ៏​រឹងមាំ​ដើម្បី​ឲ្យ​សកម្មភា​ពដឹក​ជញ្ជូន​ឈើ​របស់​ខ្លួន​ប្រព្រឹត្តទៅ​ដោយ​រលូន​។ ដូច្នេះ​ឯកឧត្តម ម៉ៅ ធនិន អភិបាលខេត្ត​ពោធិ៍សាត់ ក៏ដូចជា​ឯកឧត្តម វេង សាខុន រដ្ឋមន្ត្រី​ក្រសួង​កសិកម្ម ព្រមទាំង​លោក កែវ អូ​ម៉ាលី​ស្ស ប្រធាន​រដ្ឋបាល​ព្រៃឈើ​នៃ​ក្រសួង​កសិកម្ម មិនគួរ​បណ្ដែតបណ្ដោយ​តទៅទៀត​ទេ ព្រោះ​បច្ចុប្បន្ន​ឈ្មួញ​ឈ្មោះ តែម ធារ៉ា នៅតែ​បន្ត​សកម្មភាព​ដឹកជញ្ជូន​ឈើ​ចេញពី​ស្រុក​ភ្នំក្រវាញ​។​

​ប្រភព​ពី​មន្ត្រី​អាជ្ញាធរ​និង​សមត្ថកិច្ច​មូលដ្ឋាន​ក្នុង ស្រុក​ភ្នំក្រវាញ ខេត្ត​ពោធិ៍សាត់ បានឲ្យដឹងថា បច្ចុប្បន្ន​ឈ្មួញ​ឈ្មោះ តែម ធារ៉ា ដែល​មាន​ខ្នងបង្អែក​រឹងមាំ​នៅ​តែ​អាច​ប្រមូល​ទិញ​ឈើ ស្តុក​ឈើ និង​ដឹកជញ្ជូន​ឈើ​ចេញ​ពី​ស្រុក​ភ្នំក្រវាញ ឆ្លងកាត់​ខេត្ត​ពោធិ៍សាត់ និង​ខេត្ត​កំពង់ឆ្នាំង ចូល​មក​រាជធានី​ភ្នំពេញ យ៉ាង​រលូន​។

​មន្ត្រី​អាជ្ញាធរ​មូលដ្ឋាន​ក្នុងស្រុក​ភ្នំក្រវាញ បានឲ្យដឹង​ថា​ឈ្មួញ​ឈ្មោះ តែម ធារ៉ា គឺជា​មេបញ្ជាការ​កងរាជអាវុធហត្ថ​ស្រុក​ភ្នំក្រវាញ ហើយ​មាន​មន្ត្រី​ធំៗ​ក្នុង​ខេត្ត​ពោធិ៍សាត់ ជា​បង្អែក​រឹងមាំ​ទើប​ឈ្មួញ​រូប​នេះ​អាច​បន្ត​ទិញ​ឈើ ស្តុក​ឈើ និង​ដឹកជញ្ជូន​ឈើ​ចេញ​ពី​ស្រុក​ភ្នំក្រវាញ យ៉ាង​ពេញបន្ទុក​។ សូម្បីតែ​លោក​ឧត្តមសេនីយ៍ត្រី អ៊ុក សាម៉ុន មេបញ្ជាការ​កងរាជអាវុធហត្ថ​ខេត្ត​ពោធិ៍សាត់ ក៏​រក្សា​ភាព​ស្ងៀមស្ងាត់​ផងដែរ ក្នុង​ខណៈ​ដែល​ឈ្មួញ​ឈ្មោះ តែម ធារ៉ា ជា​មេបញ្ជាការ​កងរាជអាវុធហត្ថ​ស្រុក​ភ្នំក្រវាញ ប្រើប្រាស់​តួនាទី​របស់​ខ្លួន​ដឹកជញ្ជូន​ឈើ​ខុស​ច្បាប់​យ៉ាង​ក្រអឺតក្រទម​។​

​សមត្ថកិច្ច​ពាក់ព័ន្ធ​នៅក្នុង​ស្រុក​ភ្នំក្រវាញ បាន​បង្ហើប​ឲ្យដឹងថា គ្មាន​មន្ត្រី​ជំនាញ​ឬ​សមត្ថកិច្ច​ណា​ហ៊ាន​ប៉ះពាល់​ឈ្មួញ​ឈ្មោះ តែម ធារ៉ា ដែល​ធ្វើ​សកម្មភាព​ដឹកជញ្ជូន​ឈើ​យ៉ាង​គគ្រឹកគគ្រេង​នោះទេ ព្រោះ​មន្ត្រី​ធំៗ​ក្នុង​ខេត្ត​ពោធិ៍សាត់ មួយចំនួន​ជា​ខ្នងបង្អែក​របស់​ឈ្មួញ​រូបនេះ ហើយ​ទទួល​ផលប្រយោជន៍​ពី​ឈ្មួញ​រូប​នេះ​ជា​ប្រចាំ​។​

​ជាក់ស្ដែង​ឯកឧត្តម ម៉ៅ ធនិន អភិបាលខេត្ត​ពោធិ៍សាត់ ក៏ដូចជា​លោក ឡាយ វិសិដ្ឋ ប្រធាន​មន្ទីរ​កសិកម្ម​ខេត្ត​ពោធិ៍សាត់ ព្រមទាំង​មេ​រដ្ឋបាល​ព្រៃឈើ​ខេត្ត​ពោធិ៍សាត់ សុទ្ធ​តែ​រក្សា​ភាព​ស្ងៀមស្ងាត់​ក្នុងខណៈដែល​ឈ្មួញ​ឈ្មោះ តែម ធារ៉ា បន្ត​ប្រព្រឹត្ត​បទល្មើស​ព្រៃឈើ​យ៉ាង​សុខ​ស្រួល​។

​កន្លងមក សមត្ថកិច្ច​អាវុធហត្ថ​ខេត្ត​ពោធិ៍សាត់ និង​សមត្ថកិច្ច​អាវុធហត្ថ​ខេត្ត​លើ​ផ្ទៃ​ប្រទេស សហការ​គ្នា​បង្ក្រាប​បទ​ល្មើស​ព្រៃឈើ​ក្នុង​ស្រុក​ភ្នំក្រវាញ ជាច្រើន​ករណី ក៏ប៉ុន្តែ​ឈ្មួញ​ឈ្មោះ តែម ធារ៉ា មិន​ដែល​ប្រឈម​នឹង​ការបង្ក្រាប​ម្ដងណា​ឡើយ​។​

​សកម្មជន​ព្រៃឈើ និង​ប្រជាពលរដ្ឋ​នៅ​ក្នុងស្រុក​វា​លវែង បាន​បន្ត​ឲ្យដឹងថា ដើមឈើ​ធំៗ​ដែល​មាន​មុខកាត់​ចាប់ពី​០,៥០​ម៉ែត្រ​ត្រូវបាន​គេ​កាប់​និង​ដឹកជញ្ជូន​ចេញពី​តំបន់​ខាងលើ​តាម​រថយន្ត​បង្កុង និង​គោយន្ត​កន្ត្រៃ​ទាំងយប់​ទាំង​ថ្ងៃ​យ៉ាង​គគ្រឹកគគ្រេង​គេ​ឃើញ​មាន​កម្មក ជាច្រើន​នាក់​ប្រដាប់​ដោយ​ម៉ាស៊ីន​ស្វ័យប្រវត្តិ​បាន​ចូល​ទៅ​អារ​រំលំ​ឈើមូល​ធំៗ​ក្នុង​តំបន់​អភិរក្ស​ជួរ​ភ្នំក្រវាញ​ភាគ​កណ្ដាល និង​តំបន់​ដែនជម្រកសត្វព្រៃ​ភ្នំ​ឱ​រ៉ា​ល់ ហើយ​សមត្ថកិច្ច​ពាក់​ពន្ធ័​នៅ​ទីនោះ គឺជា​អ្នក​ឃុបឃិត​ដើម្បី​ផលប្រយោជន៍​។​

​ប្រភព​បន្តថា ឈើ​ទាំង​នោះ​ត្រូវ​គេ​ដឹក​ចូល​ទៅ​ការដ្ឋាន​ក្រុមហ៊ុន រួច​អារច្រៀក​ជា​ឈើ​ជ្រុង​ដើម្បី​នាំចេញ​ទៅ​លក់​នៅ​ស្រុក​យួន​ឆ្លងកាត់​ខេត្ត​កំពត យ៉ាង​រលូន​? សមត្ថកិច្ច​ពាក់​ពន្ធ័មើល​អត់​ឃើញ ឬ​ឃើញ​ហើយ​ធ្វើ​មើលមិនឃើញ​ឬមួយ​ទទួល​លាភសក្ការៈ​រួច​អស់ហើយ​។

​តំបន់​ឧទ្យាន​ជាតិ​ភ្នំក្រវាញ​និង​ដែនជម្រកសត្វព្រៃ​ភ្នំ​ឱ​រ៉ា​ល់​ត្រូវបាន​ព្រះមហាក្សត្រ​ព្រះ​នរោត្តម​សីហនុ​ចេញ​ព្រះរាជក្រឹត្យ​កំណត់​ជា​ព្រៃ​អភិរក្ស​ការពារ​កាលពី​ខែវិច្ឆកា​ឆ្នាំ​១៩៩៣​ដែល​មាន​ផ្ទៃដី​រាប់​ម៉ឺុន​ហិកតា កំពុង​រង​ការកាប់បំផ្លាញ​ពី​សំណាក់​ក្រុម​ហ៑ុន​ជិត​រលាយ​អស់ហើយ​។​

​សកម្មជន​បរិស្ថាន​ដែល​ចុះ​ឃ្លាំ​មើល​បទល្មើស​ព្រៃឈើ​នៅ​តំបន់​នោះ​បាន​បង្ហាញ​អារម្មណ៍​សោកស្ដាយ​ពី​វិនាស​សកម្ម​ព្រៃឈើ​បន្សល់​ទុក​ចុងក្រោយ​នៅ​គ្រា​ដែល​ឈើ​ធំៗ​ដែល​មាន​មុខ​ចាប់ពី​កន្លះ​ម៉ែត្រ​ឡើងទៅ​ត្រូវ​បាន​គេ​កាប់​និង​ដឹកជញ្ជូន​ចេញពី​តំបន់​ព្រៃ​ការពារ​ធម្មជាតិ​ដោយ​ដឹកជញ្ជូន​តាម​រថយន្ត​ប៉ា​កុង​និង​គោយន្ត​កន្ត្រៃ​រាប់​សិប​គ្រឿង​ទាំងយប់​ទាំង​ថ្ងៃ​។​

​មន្ត្រី​អង្គការក្រៅរដ្ឋាភិបាល​បន្តថា មាន​ប្រជាពលរដ្ឋ​រាប់រយ​នាក់​ត្រូវ​គេ​ប្រមូល​ឲ្យចូល​ព្រៃ​កាប់​ឈើ​ដឹកជញ្ជូន​ទៅ​លក់​ឲ្យ​ក្រុមហ៊ុន​ឧកញ៉ា​ដ៏​ល្បី​ប្រចាំ​ខេត្ត​ពោធិ៍សាត់ ហើយ​មាន​ការសម្របសម្រួល​ពី​សំណាក់​មន្ត្រី​បរិស្ថាន និង​សមត្ថកិច្ច​ពាក់ព័ន្ធ​ដទៃ​ទៀត​យ៉ាង​រលូន​។ ដើមឈើ​ធំៗ​ប្រភេទ​ឈើ​ទាល បេង សុ​ក្រំ និង​ផ្ចឹក ជាដើម​កំពុង​ប្រឈម​នឹង​សេចក្ដី​វិនាស​ព្រោះ​ជា​ឈើ​ដែល​កំពុង​ត្រូវប៉ាន់​ក្នុង​ទីផ្សារ​ប្រទេស​វៀតណាម​បច្ចុប្បន្ន ហើយ​ក្រុមហ៊ុន កំពុង​បង្កើន​សកម្មភាព​អារច្រៀក​ឈើ​ដឹកជញ្ជូន​ចេញទៅ​ស្រុក​យួន​តាម​ច្រក​ព្រំដែន​ក្នុង​ខេត្ត​កំពត និង​ដឹក​មក​ភ្នំពេញ​។​

​ប្រជាពលរដ្ឋ​ក្នុង​ស្រុក​វាលវែង ខេត្ត​ពោធិ៍សាត់ បាន​អំពាវនាវ​ដល់​សម្ដេច​តេជោ ហ៊ុន សែន នាយករដ្ឋមន្ត្រី និង​ឯកឧត្តម សាយ សំ​អាល់ រដ្ឋមន្ត្រី​ក្រសួង​បរិស្ថាន ព្រមទាំង ឯកឧត្តម ម៉ៅ ធនិន អភិបាលខេត្ត​ពោធិ៍សាត់ ចាត់វិធានការ​ទប់ស្កាត់​ជា​បន្ទាន់​ព្រោះ​មួយ​រយះ​ចុងក្រោយ​នេះ ព្រៃឈើ​នៅ​តំបន់​អភិរក្ស​ជួរ​ភ្នំក្រវាញ​ភាគ​កណ្ដាល និង​តំបន់​ដែនជម្រកសត្វព្រៃ​ភ្នំ​ឱ​រ៉ា​ល់ ព្រៃឈើ​នៅ​ទីនោះ រង​ការកាប់​បំផ្លាញ​ដោយ​គ្មាន​ញញើត​អ្វី​ទាំងអស់​៕

m190528a1 m190528a2 m190528a3 m190528a4 m190528a5 m190528a6

Filed in: ព័ត៌មាន​សំខាន់ៗ, ស្រាវជ្រាវ​តាមដាន​សង្គម

Recent Posts

Proudly designed by Theme Junkie.